MA Astudiaethau Dwyieithrwydd

Oddi ar sefydlu Cynulliad Cenedlaethol Cymru ym 1999, rhoddwyd ffocws newydd i’r ymdrechion i ddiogelu ac adfer y Gymraeg, ac ystyrir creu Cymru ddwyieithog yn nod cenedlaethol cyraeddadwy.

Rhoi’r datblygiadau cyffrous hyn yn eu cyd–destun hanesyddol, gwleidyddol, cymdeithasol a rhyngwladol yw nod y radd MA Astudiaethau Dwyieithrwydd.

Y radd hon yw’r un gyntaf o’i bath yn Ewrop ac mae’n rhan o genhadaeth y Brifysgol i gyfrannu at y bwrlwm cyffrous o weithgareddau ym maes cynllunio ieithyddol a datblygu dwyieithrwydd yng Nghymru.

At bwy yr anelir y radd

Nod y radd yw arfogi myfyrwyr â’r wybodaeth gefndirol a’r sgiliau angenrheidiol i fedru gweithio’n hyderus ym maes dwyieithrwydd a chynllunio iaith. Mae’r cwrs yn cynnig ystod eang o brofiadau ac, felly, bydd yn apelio at unrhywun sydd yn gysylltiedig â datblygu defnydd o’r iaith Gymraeg, gan gynnwys:

Athrawon a Hyfforddwyr
Cyfieithwyr
Gweithwyr Ieuenctid / Cymunedol
Swyddogion Iaith
Swyddogion y Llywodraeth / Llunwyr Polisi

Y mae ffocws y radd yn eang ac, felly, y mae’n addas ar gyfer ystod o feysydd
proffesiynol.

Cynnwys y Cwrs

Gall y radd gynnig llwybrau gwahanol sydd yn ateb gofynion galwedigaethol amrywiol. Cynhwysa chwe modwl a thraethawd tua 20,000 o eiriau. Gellir dewis amrywiaeth o fodylau yn ôl anghenion personol gan gynnwys y canlynol, er enghraifft:-

Cyflwyniad i Ddwyieithrwydd (diffiniadau a gwahaniaethau)
Dwyieithrwydd Cymdeithasol (agweddau gwleidyddol ar fywiogrwydd iaith)
Agweddau Deallusol a Gwybyddol ar Ddwyieithrwydd
Modelau ar gyfer Addysgu Dwyieithog
Datblygiad Addysg Ddwyieithog yng Nghymru
Natur Ymchwil
Astudiaeth Annibynnol

Testun o ddewis y myfyriwr / fyfyrwraig ei hun fydd y traethawd a fydd yn seiliedig ar agweddau a astudiwyd yn y modylau, ond a gymeradwyir gan y Brifysgol ymlaen llaw. Disgwylir y rhydd hynny gyfle i fyfyrwyr ddewis testun a fydd yn berthnasol i’w galwedigaeth.

Drwy gwblhau tri modwl yn llwyddiannus gall myfyrwyr fod yn gymwys ar gyfer Tystysgrif Ôl-raddedig mewn Astudiaethau Dwyieithog, a thrwy gwblhau chwe modwl, Ddiploma Ôl-raddedig mewn Astudiaethau Dwyieithog. Bydd angen i fyfyrwyr gwblhau’r traethawd hir ychwanegol ar gyfer y radd MA Astudiaethau Dwyieithog.

Dull Astudio

Gellir astudio yn rhan-amser dros gyfnod o bedair blynedd.

Pam astudio’r radd hon yn y Drindod?

Mae gan y Drindod arbenigedd ym maes cynllunio ieithyddol a dwyieithrwydd
Mae’r Brifysgol yn rhan o rwydwaith o sefydliadau ar draws Ewrop sy’n ymwneud â dwyieithrwydd
Mae gan y Brifysgol adnoddau arbennig yn y maes hwn ac ar gyfer datblygiad proffesiynol parhaus
Mae’r cwrs yn rhan o Gynllun Meistr Modwlar y Drindod sy’n golygu bod dewis eang o fodylau ar gael er mwyn sicrhau bod y radd yn cwrdd ag anghenion proffesiynol a diddordebau personol myfyrwyr

Manyleb Rhaglen

Amcanion y Rhaglen

Mae’r rhaglen yn anelu at:

ddarparu ystod o agweddau ar faes dwyieithrwydd yng Nghymru ar gyfer myfyrwyr gan gyfeirio yn ogystal at gyd-destunau rhyngwladol perthnasol;
ddatblygu gallu myfyrwyr i ddadansoddi’n feirniadol y ffactorau amrywiol sydd ymhlŷg ag astudio dwyieithrwydd ac i berthnasu’r ffactorau hynny ar lefel ryngwladol â sefyllfa’r Gymraeg yng Nghymru;
ddarparu myfyrwyr ar gyfer galwedigaethau amrywiol sy’n ymwneud â dwyieithrwydd a’u galluogi i gymhwyso egwyddorion sylfaenol, ynghyd â gwybodaeth, dealltwriaeth a medrau pwnc-seiliedig, at eu hanghenion galwedigaethol beunyddiol;
gyflwyno i fyfyrwyr y syniadaeth a’r ymchwil mwyaf perthnasol yn y maes sydd yn sail i’r damcaniaethau a’r doethineb diweddaraf;
ddatblygu medrau trosglwyddadwy myfyrwyr a’u gallu i ymchwilio, dehongli a gwerthuso’n feirniadol;
ddatblygu medrau gwybyddol myfyrwyr gan gynnwys eu gallu i resymu, dadansoddi’n feirniadol, yn ogystal â meddwl yn greadigol gan arfarnu unrhyw bolisïau presennol ym maes dwyieithrwydd a chynnig gwelliannau.

Deilliannau Dysgu

Gwybodaeth, dealltwriaeth a medrau perthnasol

Ar ôl gorffen y radd MA Astudiaethau Dwyieithrwydd, disgwylir y bydd myfyrwyr wedi datblygu’r wybodaeth, y deall a’r medrau canlynol ar y lefel Addysg Uwch briodol.

Gwybodaeth a dealltwriaeth feirniadol am gyd-destunau ieithyddol a diwylliannol eraill ar lefel ryngwladol mewn cymunedau a chymdeithasau lle mae dwyieithrwydd yn bodoli ac a fydd yn galluogi myfyrwyr i’w cymharu a’u cyferbynnu â’u cyd-destunau ieithyddol eu hunain gan ddatblygu sensitifrwydd ac ymwybyddiaeth o’r tebygrwydd neu’r anhebygrwydd ieithyddol sydd rhyngddynt.
Ymwybyddiaeth a dealltwriaeth rhyngddiwylliannol. Drwy ddatblygu’r gallu i ddadansoddi’n feirniadol y ffactorau amrywiol sy’n rhan annatod o fywiogrwydd ieithoedd lleiafrifol megis y Gymraeg, disgwylir y bydd myfyrwyr â pharch at sefyllfaoedd cyffelyb ar lefel ryngwladol.
Dealltwriaeth feirniadol o’r polisïau a ymarferir mewn cyd-destunau ieithyddol gwledydd amrywiol.
Y gallu i werthuso’n feirniadol y ffactorau a allai ddylanwadu’n gadarnhaol neu’n negyddol yn y dyfodol ar fywiogrwydd eu mamiaith a’u diwylliant eu hunain, gan gynnwys, er enghraifft, bolisïau awdurdodau lleol a chyrff cyhoeddus mewn perthynas ag economeg a thai.
Gwybodaeth am ystod o derminoleg arbenigol sydd yn ymwneud â gwahanol agweddau ar ddwyieithrwydd gan gynnwys agweddau megis sosio-ieithyddiaeth, seico-ieithyddiaeth, cynllunio ieithyddol, caffaeliad iaith a’u rôl mewn perthynas â chyfundrefnau addysgol.
Gwybodaeth drylwyr am y prif fframweithiau cysyniadol a’r ymchwil diweddaraf sydd yn bodoli ym maes dwyieithrwydd, ynghyd â’r gallu i bwyso a mesur rhagoriaethau a gwendidau syniadau, esboniadau a thystiolaethau gwrthgyferbyniol.
Dealltwriaeth o ddadansoddiadau amgen o ddata a’r gallu i wneud gwerthusiad gwybodus o’r rheiny.
Y gallu i ddangos dealltwriaeth o’r berthynas rhwng y ffactorau amrywiol a all ddylanwadu ar fywiogrwydd iaith gan gynnwys ffactorau gwleidyddol, cymdeithasol, diwylliannol ac addysgol.
Ymwybyddiaeth o swyddogaeth iaith mewn perthynas â meithrin, cynnal a datblygu hunaniaeth genedlaethol.
Medrau technolegol a fo’n addas i’r ddisgybliaeth, megis llunio llyfryddiaethau a chyfeirio at ffynonellau mewn modd safonol a chyson.
Y gallu i gymhwyso fframweithiau cysyniadol a dadansoddol cydnabyddiedig at ddata newydd.
Y gallu i ddehongli data a dadansoddiadau meintiol ac ansoddol a gyflwynir drwy gyfrwng graffau, tablau ac ati, ac i gyflwyno data tebyg eu hunain yn yr un modd.

Medrau Gwybyddol

Caniatâ’r medrau gwybyddol a gysylltir â’r rhaglen hon fyfyrwyr i:

fyfyrio’n feirniadol yng ngoleuni tystiolaeth a safbwyntiau amrywiol;
gasglu, crynhoi, cyfosod a chymathu gwybodaeth o wahanol ffynonellau ysgrifenedig, llafar ac electronig, eu gwerthuso’n feirniadol a chreu crynodeb cydlynol;
drefnu a chyflwyno syniadau o fewn fframwaith safbwynt strwythuredig a rhesymegol;
feddwl yn ddadansoddol ac yn werthusol;
arnodi, disgrifio a dadansoddi problemau ac i ddyfeisio strategaethau addas ar gyfer eu datrys;
ddangos dealltwriaeth o faterion allweddol a phroblemau ac i benderfynu pa fath o ddata i gasglu er mwyn eu datrys;
gyflwyno/ddatgan tystiolaeth berthnasol ac i ddefnyddio’r data priodol sydd eisoes ar gael er mwyn datrys problemau.

Medrau Proffesiynol/Galwedigaethol

Galluoga’r medrau proffesiynol/galwedigaethol a gysylltir â’r rhaglen hon fyfyrwyr i:

gwrdd â’r her sy’n wynebu unigolion ym maes dwyieithrwydd a chynllunio iaith;
ymgymryd â phrosiectau sy’n ymwneud ag amryw agweddau yn y maes;
gynnal ymchwil unigol ac, fel rhan o dîm, i hyrwyddo cynlluniau a strategaethau ieithyddol;
ddadansoddi a dehongli data sy’n ymwneud ag amryw ddatblygiadau;
ddangos hyfedredd wrth ddefnyddio TGCh mewn cyflwyniadau ac wrth gyfathrebu.

Medrau Allweddol Trosglwyddadwy

Galluoga’r medrau allweddol a gysylltir â’r rhaglen hon fyfyrwyr i:

ddefnyddio TGCh yn effeithiol fel modd i gyfathrebu, fel cyfrwng dysgu ac ymchwilio, ac i greu dogfennaeth drefnus a safonol;
drosglwyddo gwybodaeth, syniadau a dadleuon yn argyhoeddedig a rhesymegol ar lafar ac yn ysgrifenedig;
feithrin ymhellach eu sgiliau dadansoddi a datrys problemau;
fabwysiadu methodolegau amrywiol a phwrpasol ar gyfer cynnal ymchwil gan asesu eu heffeithiolrwydd a’u manteision ac anfanteision ymarferol a thechnolegol unigol;
ysgrifennu traethodau gan ddefnyddio ieithwedd bwrpasol a chyfeiriadaeth gywir;
reoli eu haddysg mewn modd hunan-feirniadol, i feddwl ac i weithio’n annibynnol gan wneud defnydd effeithiol ac effeithlon o’u hamser;
gynllunio a chynnal archwiliad neu ddarn o ymchwil gyda’r lleiafswm o gymorth neu yn gwbl annibynnol;
gymryd rhan mewn trafodaethau ysgolheigaidd ac i gyflwyno syniadaeth naill ai ar lafar neu yn ysgrifenedig mewn dogfennaeth a ddengys sgiliau uwch mewn llythrennedd.

Ffïoedd

Adolygir y ffïoedd yn flynyddol – cysylltwch â ni am wybodaeth.
Gall fod grantiau ar gael drwy Gyngor Addysgu Cyffredinol Cymru

Sut mae gwneud cais

Am ragor o wybodaeth ac i wneud cais cysylltwch â:

Dr Hywel Glyn Lewis
01267 676680
h.lewis@drindod.ac.uk

Canllaw yw'r wybodaeth hon. Cysylltwch â ni i drafod y cwrs.