MBA Rheolaeth y Celfyddydau

Ysgol y Celfyddydau Creadigol a Dyniaethau

Astudio ar gyfer MBA mewn Rheolaeth y Celfyddydau

Os ydych chi’n ystyried gyrfa ym maes rheolaeth y celfyddydau, MBA Coleg Prifysgol y Drindod yw’r rhaglen ddelfrydol i’ch helpu i wireddu’ch uchelgais. Gellir ei astudio’n rhan-amser neu’n llawn-amser, ac mae’n darparu cyfoeth o gyfleoedd rhwydweithio yn y sector gan gynnwys lleoliadau gwaith.

Ydw i’n gymwys i ymgeisio?

Os oes gennych radd gyntaf dda neu gymhwyster cyfwerth, neu’r profiad a’r sgiliau i’ch paratoi ar gyfer astudiaeth ar lefel uwch, yna rydych yn gymwys. Byddai gradd gyntaf ym maes y celfyddydau’n ddymunol ond nid yn hanfodol, ond mae’n rhaid bod gennych ddiddordeb cryf mewn gweithio yn y celfyddydau.

Beth fyddaf i’n ei astudio?

Bydd yr MBA yn edrych yn fanwl ar faterion cyfoes ym maes y celfyddydau a diwylliant, ac yn datblygu’ch sgiliau rheoli i gryfhau eich perfformiad yng nghyd-destun ehangach materion rheoli’r celfyddydau yng Nghymru, y DU a’r tu hwnt.

Rhennir y cwrs yn bedair prif elfen:

Modylau ar y Celfyddydau yn edrych ar gyllido’r celfyddydau, rheoli cleientiaid a’r diwydiannau creadigol
Modylau Rheoli: cyllid, adnoddau dynol, marchnata a strategaeth, defnyddio astudiaethau achos yn seiliedig ar y celfyddydau.
Gwaith ymchwil a phrosiectau yn eich paratoi ar gyfer Traethawd Estynedig neu Brosiect Mawr.
Lleoliadau gwaith ar gyfer y myfyrwyr i gyd, yn llawn-amser a rhan-amser, mewn amgylchedd celfyddydol.

Sut a ble byddaf i’n dysgu?

Byddwch yn mynychu Coleg Prifysgol y Drindod yn wythnosol ar gyfer darlithiau, seminarau a gwaith grwˆp. Gallwch drefnu eich amserlen astudio eich hun, gan gadw mewn cysylltiad â thiwtoriaid a myfyrwyr drwy e-bost. Gellir teilwra’r aseiniadau i’ch cyd-destun personol chi, ond byddant wedi’u cynllunio i ehangu eich profiadau trwy gymhwyso cysyniadau a thechnegau newydd.

Faint o amser astudio fydd ei angen arnaf?

Mae pob modwl 10 credyd yn cyfateb i ryw 100 o oriau astudio, yn cynnwys darlithiau, seminarau, darllen a pharatoi aseiniadau. At ei gilydd, bydd yr MBA llawn yn cymryd rhyw ddwy i dair blynedd o astudio’n rhan-amser, neu hyd at ddwy flynedd academaidd o astudio’n llawn-amser.

Pwy fydd yno i’m cynorthwyo?

Fe gewch chi enw a rhif cyswllt fydd yno ar eich cyfer a byddwch hefyd yn gallu rhwydweithio gyda’ch cyd-fyfyrwyr i drafod materion cyffredin, ac i gefnogi’ch gilydd.

Faint fydd yn ei gostio?

Gallwch dalu am bob modwl yn ei dro, gan rannu’r gost ariannol dros gyfnod y cwrs cyfan.Trefnwyd pris arbennig ar gyfer ffioedd 2007/08 sef £200 am bob modwl 10 credyd. (£6,000 ar gyfer myfyrwyr ryngwladol).

A fydd y cwrs yn cynnig yr hyblygrwydd sydd ei angen arnaf?

Mae hyblygrwydd yn rhan annatod o’r cwrs i’ch helpu i gyrraedd eich nod gan gyflawni eich ymrwymiadau gwaith a bywyd ar yr un pryd. Hefyd gallwch ddewis rhoi’r gorau i’r cwrs ar un o dri phwynt gadael, gan ennill cymhwyster am yr astudiaeth yr ydych wedi’i chwblhau:

Tystysgrif Ôl-raddedig (6 modwl, 60 credyd)
Diploma Ôl-raddedig (12 modwl, 120 credyd)
Yn ychwanegol, drwy gwblhau’r Traethawd Estynedig 60 credyd fe gewch radd MBA llawn, cyfanswm o 180 credyd.

Pam y Drindod?

Mae ein staff wedi ymrwymo i bartneriaeth effeithiol ym myd y Celfyddydau ac mae ganddynt brofiad eang o addysgu ac ymchwilio
Yr MBA Rheolaeth y Celfyddydau yw’r unig un o’i bath ym Mhrydain
Rydym yn cyflwyno’r cwrs yn ddwyieithog pan fo modd
Cefnogir yr MBA gan sefydliadau o fyd y Celfyddydau a phobl broffesiynol o bob maes
Mae MBA yn cynyddu ystod y dewisiadau gyrfaol sydd ar gael i bobl broffesiynol ym myd y Celfyddydau
Bellach, mae llawer o sefydliadau rhyngwladol yn ystyried MBA yn gymhwyster sylfaenol i reolwyr
Mae galw cynyddol am raddau MBA mewn sefydliadau sector cyhoeddus yn dilyn pwysau gan y llywodraeth am well perfformiad â llai o gostau
Mae graddau MBA yn cyfrannu at lwyddiant pob busnes, yn enwedig os yw’n ymgiprys am farchnadoedd arbenigol pan fo globaleiddio ar gynnydd
Mae MBA yn gwneud y rheolwr yn fwy hyderus ac effeithiol

Manyleb Rhaglen

Amcanion y Rhaglen

darparu myfyrwyr â dealltwriaeth integredig ac ymwybyddiaeth feirniadol o Reolaeth y Celfyddydau, a’u helpu wrth ddod yn Rheolwyr effeithiol ar y Celfyddydau;
darparu sylfaen academaidd cadarn i fyfyrwyr yn Rheolaeth y Celfyddydau a sut mae wedi datblygu yng Nghymru a’r Deyrnas Unedig;
galluogi myfyrwyr i wneud astudiaeth uwch o sefydliadau’r celfyddydau, y rheolaeth ohonynt a’r cyd-destun allanol newidiol maent yn gweithredu ynddo;
datblygu gallu myfyrwyr i gymhwyso gwybodaeth a dealltwriaeth o fusnes a rheolaeth yn y celfyddydau at faterion cymhleth, yn systematig ac yn greadigol, ac i wella ymarfer busnes a rheolaeth;
ymgyfarwyddo myfyrwyr â’r prif destunau sy’n ffurfio sylfaen llawer o ddamcaniaeth ac ymarfer Rheolaeth y Celfyddydau;
gwella sgiliau trosglwyddadwy myfyrwyr mewn ymchwil, dehongli a gwerthuso’n feirniadol;
datblygu sgiliau deallusol myfyrwyr, gan gynnwys rhesymu beirniadol, dadansoddi, creadigrwydd ac adfyfyrio.

Deilliannau Dysgu

Gwybodaeth, dealltwriaeth a sgiliau perthnasol

Ar ôl cwblhau’r rhaglen, bwriedir y bydd myfyrwyr wedi datblygu’r wybodaeth, y ddealltwriaeth a’r sgiliau canlynol i’r lefel AU briodol:

arddangos gwybodaeth a dealltwriaeth berthnasol o sefydliadau’r celfyddydau, y cyd-destun allanol maent yn gweithredu ynddo a sut maent yn cael eu rheoli;
dangos ymwybyddiaeth feirniadol o themâu, dadleuon, a dulliau allweddol sy’n berthnasol i’r ddisgyblaeth a, lle bo’n briodol, i ddisgyblaethau cysylltiedig;
arddangos gwybodaeth briodol am Reolaeth y Celfyddydau a’i mynegiannau cymdeithasol a diwylliannol;
arddangos dealltwriaeth feirniadol o faterion traws-ddisgyblaethol sy’n berthnasol i Reolaeth y Celfyddydau;
crynhoi, cyflwyno a dehongli ystod o ffynonellau gwreiddiol ac eilaidd, gan gynnwys deunyddiau o ddisgyblaethau gwahanol;
arddangos ystod briodol o sgiliau gwybyddol, beirniadol a deallusol, sgiliau ymchwil a sgiliau personol a rhyngbersonol perthnasol.

Sgiliau (meddwl) deallusol

Bydd y sgiliau deallusol penodol sy’n gysylltiedig â’r rhaglen hon yn gadael i fyfyrwyr:

ymateb i ddadleuon, cysyniadau a pharadeimau, a’u gwerthuso’n feirniadol o ran tystiolaeth academaidd;
ddatblygu’r gallu i gyfosod gwybodaeth, ac i ddehongli testunau a’u dadansoddi’n feirniadol, o amrywiaeth o ffynonellau;
ddatblygu’r gallu i ddadansoddi’r dadleuon y damcaniaethau a’r cysyniadau y cyfarfyddir â hwy ar y cwrs yn feirniadol ac i’w cwestiynu;
greu a datblygu syniadau ymchwil a fydd yn cyfrannu at gorff y wybodaeth ar Reolaeth y Celfyddydau;
gyfarwyddo a rheoli’u dysgu a’u datblygiad proffesiynol parhaus eu hun;
ddangos ymwybyddiaeth feirniadol am eu hymatebion eu hun i Reolaeth y Celfyddydau a bod yn barod i ymaddasu i egwyddorion a dealltwriaethau newydd.

Sgiliau Galwedigaethol/Proffesiynol

Bydd y sgiliau galwedigaethol/proffesiynol sy’n gysylltiedig â’r rhaglen hon yn gadael i fyfyrwyr:

gyflawni’r heriau sy’n wynebau rheolwyr y celfyddydau cyfoes;
gymryd rhan weithredol mewn trafodaethau a phrojectau sy’n berthnasol i’r proffesiwn;
ddangos y gallu i adennill, didoli a dewis gwybodaeth o ystod o ffynonellau;
ddadansoddi a dehongli data gwreiddiol ac eilaidd;
ddangos cymhwysedd wrth ddefnyddio TGCh yn effeithiol mewn cyflwyniadau a chyfathrebu;
gynllunio ac ymgymryd â phrojectau ymchwil graddfa fach.

Sgiliau Allweddol/Cyffredin

Bydd y sgiliau allweddol/cyffredin penodol sy’n gysylltiedig â’r rhaglen hon yn gadael i fyfyrwyr:

gyfathrebu gwybodaeth, syniadau, dadleuon, egwyddorion a damcaniaethau drwy ddulliau amrywiol: er enghraifft, traethodau a drefnir ac a gyflwynir yn glir;
gyfathrebu gwybodaeth, syniadau, egwyddorion a damcaniaethau drwy ddulliau llafar a gweledol addas;
adnabod, casglu a thrafod data a deunyddiau o ffynonellau gwreiddiol, naill ai drwy astudiaethau testunol neu waith maes;
reoli amser, gweithio yn ôl terfynau amser a blaenoriaethu;
roi sylw i, ac adfyfyrio ar syniadau a dadleuon pobl eraill;
gydweithio fel aelod o dîm neu grŵp;
ymgymryd ag astudiaeth annibynnol (gan gynnwys rheoli amser) ac ystyried eich cryfderau a'ch gwendidau fel dysgwr;
ddefnyddio adnoddau'r llyfrgell er mwyn canfod deunyddiau ffynhonnell, llunio llyfryddiaethau, goleuo ymchwil a gwella cyflwyniadau;
ddefnyddio sgiliau TG a chyfrifiadurol er mwyn casglu data, adnabod deunyddiau ffynhonnell a chefnogi cyflwyniadau ymchwil.

Sut mae cael rhagor o wybodaeth?

Yn y lle cyntaf, cysylltwch â Swyddog Gweinyddol yr MBA

01267 676863 neu 676767
mbaenquiries@trinity-cm.ac.uk

Ysgol y Celfyddydau Creadigol a Dyniaethau,
Coleg Prifysgol y Drindod, Caerfyrddin
SA31 3EP,

Lluniau gan: Canolfan Mileniwm Cymru, Andrew Jeffery; Tate Modern, Tate Photography